فیصل آباد( این این آئی) پاکستان مسلم لیگ (ن) کی سینئر نائب صدر و چیف آرگنائزر مریم نواز نے کہاہے کہ مسلم لیگ (ن) الیکشن میں جیت کے لئے اترے گی لیکن ترازوکے پلڑے برابر نہ ہوں تو صرف سلیکشن ہوتی ہے، بدقسمتی سے سوشل میڈیا کو کوڑے دان اور گٹر سوچ کاذریعہ بنادیاگیا، معاشرے میں نفرتوں کی آگ ختم کرنا ہوگی۔ان خیالات کا اظہار انہوں نے گزشتہ روز مسلم لیگ (ن) فیصل آباد ڈویژن کے تنظیمی اجلاس کی صدارت کے دوران گفتگو کرتے ہوئے کیا ۔ اجلاس میں تنظیمی ڈھانچے کی کارکردگی کا تفصیلی جائزہ لیاگیا اور پارٹی ونگز کے درمیان اشتراک عمل کو مضبوط بنانے پر تجاویز پر بھ غور ہوا ۔مریم نواز نے بھرپور تنظیمی کونشن منعقد کرنے پر پارٹی قیادت، عہدیداروں اور کارکنوں کو مبارک دیتے ہوئے کہا کہ فیصل آباد میں کارکنوں کا جذبہ بڑا متاثرکن تھا ، خواتین اور یوتھ کی بھرپور شرکت پر بے حد خوش ہوں، خواتین اور یوتھ کی بڑھتی تعداد دیکھ کر کہاجاسکتا ہے کہ مسلم لیگ (ن) نوجوانوں کی جماعت ہے، فیصل آباد کے شیروں کی آواز کی گونج پورے پاکستان نے سنی ۔ انہوں نے کہا کہ مسلم لیگ (ن) الیکشن میں جیت کے لئے اترے گی تاہم ترازوکے پلڑے برابر نہ ہوں تو صرف سلیکشن ہوتی ہے۔ مسلم لیگ (ن) ترقی اور عوام کی خوش حالی کا دوسرا نام ہے، مہنگائی میں صرف مسلم لیگ (ن) ہی کمی لاسکتی ہے، خواتین اور نوجوانوں کو قیادت کی صف میں لائیں گے، نصف آبادی خواتین اور 68 فیصد نوجوان آبادی کو زیادہ مواقع دیں گے، خواتین اور نوجوانوں کی ترقی سے پاکستان میں اصل تبدیلی آئے گی۔ مریم نواز نے کہا کہ سوشل میڈیا کی طاقت کو اچھے جذبوں اور مثبت سوچ پھیلانے کے لئے استعمال کریں، معاشرے میں نفرتوں کی آگ ختم کرنا ہوگی، بدقسمتی سے سوشل میڈیا کو کوڑے دان اور گٹر سوچ کاذریعہ بنادیاگیا، مسلم لیگ (ن) کے سوشل میڈیا رضاکار یہ گند صاف کرنے میں کردار ادا کریں۔انہوں نے کہا کہ مسلم لیگ (ن) کے سوشل میڈیا ونگ کو مسلم کلچر کی شناخت بننا ہے۔اس موقع پر شرکاء نے مریم نوازکو سینئر نائب صدر اور چیف آرگنائزر بننے پر مبارک دی۔
