اسلام آباد (این این آئی)وزارت مذہبی امور نے ریگولر اور سپانسر شپ سکیم کے عازمین کو حج پر روانگی سے قبل ہی بینکوں کے ذریعے قربانی کے 55 ہزار روپے ادا کرنے کا فیصلہ کیا ہے۔ جمعہ کو وزارت کے ترجمان کے مطابق وزیر مذہبی امور سینیٹر محمد طلحہٰ محمود کی خصوصی ہدایت پر تمام عازمین ریگولر اورسپانسر شپ سکیم کے عازمین کو قربانی کیلئے 55 ہزار روپے فی کس دیئے جا رہے ہیں۔ عازمین یہ رقم روانگی سے قبل متعلقہ بینک سے بذریعہ کیش یا اپنے اکائونٹ میں حاصل کریں۔ کیش کی صورت میں عازم حج کی اصل بینک رسید، اصل شناختی کارڈ دکھانا لازم ہو گا۔ واضح رہے کہ تمام عازمین کیلئے روانگی سے قبل بذریعہ متعلقہ بینک قربانی رقوم لینا لازم ہے۔ سعودی عرب جا کر رقم واپس نہیں ملے گی۔ سرکاری رہائشگاہوں کے نزدیک سعودی حکومت کے زیر انتظام قربانی بوتھ تک آسان رسائی اور کوپن خریدنے کی سہولت مہیا کی جائے گی۔ شیرخوار بچے اور ریفنڈ لینے والے قربانی رقم کے اہل نہیں ہیں۔ قربانی کی رقم کے حصول میں کسی دشواری کی صورت میں وزارت کے اکاؤنٹس افسر کو 0519208552 پر شکایت کی جا سکتی ہے۔
