اسلام آباد (این این آئی)وفاقی وزیر خزانہ سینیٹر محمد اسحق ڈار نے کہا ہے کہ پاکستان اسٹاف لیول کے معاہدے پر کامیابی سے پہنچ گیا ہے۔پیر کو جاری اعلامیہ کے مطابق عوامی جمہوریہ چین کے سفارتخانے کی ناظم الامور محترمہ پینگ چنکسو نے وزیر خزانہ سینیٹر محمد اسحاق ڈار سے ملاقات کی ۔ وزیر خزانہ سینیٹر محمد اسحاق ڈار نے ناظم الامور کا پرتپاک استقبال کیا اور پاکستان اور چین کے درمیان گہرے تاریخی دوطرفہ تعلقات کو سراہا۔ وزیر خزانہ نے ناظم الامور کو آئی ایم ایف کے ساتھ 9ویں جائزے پر ہونے والی پیش رفت کے بارے میں آگاہ کرتے ہوئے کہا کہ پاکستان اسٹاف لیول کے معاہدے پر کامیابی سے پہنچ گیا ہے۔ انہوں نے ناظم الامور کو معیشت میں استحکام کے بارے میں بھی آگاہ کیا کہ حکومت کس طرح اس معاشی استحکام کو برقرار رکھنے اور معیشت کو ترقی کی طرف لے جانے کے لیے اقدامات کر رہی ہے۔ مزید برآں، انہوں نے متعدد محاذوں پر پاکستان کے لیے چین کی حمایت کو سراہا، بالخصوص گزشتہ چند ماہ کے دوران پاکستان کے ساتھ چینی مالیاتی اداروں کے تعاون کا شکریہ ادا کیا۔پینگ چنکسو نے دونوں ممالک کے درمیان گہرے دوستانہ تعلقات کے بارے میں جذبات کا اظہار کیااور مشکل معاشی حالات کے باوجود ملک میں معاشی استحکام بحال کرنے کے لیے حکومت پاکستان کے اقدامات کو بھی سراہا۔ انہوں نے وزیر خزانہ کو مزید یقین دلایا کہ چینی حکومت پاکستان کی حمایت جاری رکھے گی۔دونوں فریقوں نے اقتصادی، تجارتی اور مالیاتی شعبوں میں دوطرفہ تعلقات کو مزید مضبوط بنانے کے لیے دونوں ممالک کے لیے دستیاب مختلف وسائل پر بھی تبادلہ خیال کیا تاکہ تعاون کو بے مثال سطح تک فروغ دیا جا سکے۔آخر میں وزیر خزانہ اسحاق ڈار نے ہر قسم کے تعاون کے لیے جو پاکستان کو بیجنگ میں قیادت سے ہمیشہ حاصل رہا ہے کیلئے محترمہ پینگ چنکسو کا شکریہ ادا کیا۔
