لاہور ( این این آئی) نگران وزیراعلیٰ پنجاب محسن رضا نقوی نے کہا ہے کہ انتخابات کروانا الیکشن کمیشن کا کام ہے، الیکشن کمیشن جب کہے گا انتخابات ہو جائیں گے۔نگران وزیراعلی پنجاب نے لاہور،سیالکوٹ موٹروے سے گوجرانوالہ کو لنک کرنے کے منصوبے کا دورہ کیا اور پراجیکٹ پر جاری تعمیراتی کاموں کا معائنہ کیا، وزیراعلی پنجاب نے منصوبے پر کام کی رفتار مزید تیز کرنے کی ہدایت کی۔انہوں نے کہا کہ گوجرانوالہ موٹروے لنک روڈ پراجیکٹ میں اعلی تعمیراتی معیارکو یقینی بنایا جائے، پراجیکٹ کو مقررہ مدت میں مکمل کرنے کیلئے اضافی وسائل بروئے کار لائے جائیں۔محسن نقوی نے گوجرانوالہ موٹر وے لنک روڈ پراجیکٹ کی زیر تعمیر سڑک کا بھی معائنہ کیا، وزیراعلی محسن نقوی نے منصوبے کو مقررہ مدت میں مکمل کرنے کیلئے متعلقہ حکام کو ضروری ہدایات دیں۔اس موقع پر بریفنگ میں نگران وزیراعلی پنجاب کو بتایا گیا کہ 11 ارب روپے کی لاگت کے اس منصوبے کی جلد تعمیر میں حائل رکاوٹیں خوش اسلو بی سے دور کر لی گئی ہیں، 15.2 کلو میٹر طویل دو رویہ کا رپیٹڈ سڑک موٹر وے کے لئے بہترین رسائی فراہم کرے گی، منصوبے کو 90 دنوں کے اندر مکمل کرنے کے لئے تمام وسائل برو ئے کار لا رہے ہیں۔بریفنگ میں مزید بتایا گیا کہ جدید سفری سہولیات سے وقت اور ایندھن کی بچت اور جی ٹی روڈ پر ٹریفک کا رش کم ہو گا۔ ایف ڈبلیو او کے حکام نے وزیراعلی محسن نقوی کو پراجیکٹ کے بارے میں بریفنگ دی۔دورے کے بعد میڈیا سے گفتگو کرتے ہوئے وزیراعلی پنجاب محسن نقوی کا کہنا تھا کہ بارشوں کے باوجود یہ پراجیکٹ اپنے مقررہ وقت میں مکمل کیا جائے گا، بارشوں کے باعث کام میں کچھ تاخیر ہوئی لیکن اسے دن رات کام کرکے پورا کیا جائے گا، گوجرانوالہ کو جلد موٹر وے سے لنک کر دیا جائے گا۔محسن نقوی نے کہا کہ گوجرانوالہ کے دونوں ہسپتالوں کے درمیان شٹل سروس شروع ہو چکی ہے، ہسپتالوں میں ایچ آر کی کمی کو پورا کیا جائے گا، اسلامیہ یونیورسٹی بہاولپور کے واقعہ کی ابتدائی تحقیقات مکمل ہوچکی ہیں ، ذمہ داروں کوسخت سزا ملے گی، ضرورت پڑی توجوڈیشل انکوائری بھی کرائیں گے، پولیس کو مکمل بااختیار بنایا ہے۔
