لاہور(این این آئی)بچوں کے مشہور ڈرامے ”عینک والا جن”میں بل بتوڑی کا کردار ادا کرنے والی اداکارہ نصرت آرا کو دنیا سے رخصت ہوئے 6سال بیت گئے۔نصرت آرا نے اپنے فنی کیریئر میں صرف ایک ہی مشہور ڈرامہ عینک والا جن کیا جس میں ان کے کردار بِل بتوڑی کو خوب پسند کیا گیا۔نصرت آرا کراچی سے لاہور منتقل ہوئیں تاکہ کسی بڑے ڈرامے میں کام کر سکیں لیکن عینک والا جن کے علاوہ انہیں کوئی ڈرامہ نہ ملا،کام نہ ملنے کے باعث وہ شدید مالی مشکلات سے بھی دوچار رہیں۔90کی دہائی میں سرکاری ٹی وی پر نشر ہونے والا ڈرامہ عینک والا جن بچوں اور بڑوں میں یکساں مقبول ہوا،اداکارہ نصرت آرا نے بل بتوڑی کا کردار کمال خوبصورتی سے نبھایا،بچوں کو عینک والا جن کی اگلی قسط کا شدت سے انتظار رہتا تھا۔نصرت آرا 14اکتوبر 2017 کو پھیپھڑوں کے عارضے کے باعث 65سال کی عمر میں لاہور میں انتقال کر گئیں۔
