اسلام آباد (این این آئی)نگراں وزیراعظم انوار الحق کاکڑ سعودی عرب میں او آئی سی کے غیر معمولی اجلاس میں شرکت کریں گے۔ دفتر خارجہ کی ترجمان نے جمعہ کو پریس بریفنگ میں کہا کہ وزیراعظم اس اجلاس میں شرکت کے لئے سعودی عرب کا دورہ کر رہے ہیں۔ سربراہ اجلاس سے قبل وزیر خارجہ جلیل عباس جیلانی وزراء خارجہ کے اجلاس میں شریک ہوں گے۔ ترجمان نے کہا کہ پاکستان بین الاقوامی اتفاق رائے کو آگے بڑھانے اور فلسطینی عوام کے خلاف اسرائیلی جارحیت کے فوری خاتمے اور غزہ کے عوام کیلئے امداد کی فوری فراہمی کے لیے کوششوں کو تیز کرنے کے لیے اپنا کردار ادا کرتا رہے گا۔
