راولپنڈی (این این آئی)سابق امریکی صدر ڈونلڈ ٹرمپ کے نااہل ہونے پر استحکام پاکستان پارٹی کے رہنما فیاض چوہان نے اپنے ردعمل میں کہا ہے کہ امریکی عدالت نے پارلیمنٹ پر حملہ کروانے کے جرم میں ڈونلڈ ٹرمپ کو نااہل قرار دیا ہے۔سماجی رابطے کی ویب سائٹ ایکس (سابق ٹوئٹر) پر جاری کیے گئے بیان میں فیاض چوہان نے کہا کہ پاکستان کا عدالتی سسٹم پاکستانی ڈونلڈ ٹرمپ کو ڈیڑھ سال سے 21 توپوں کی سلامی پیش کررہا ہے۔ فیاض چوہان نے کہا کہ امریکی عدالت کا فیصلہ رول آف لاء کی اعلیٰ مثال ہے، امریکی عدالتی سسٹم نے محض ایک مقام پر فتنہ و فساد برپا کرنے پر ٹرمپ کو نااہل قرار دے دیا۔انہوں نے کہا کہ پاکستان میں 9 مئی کو بیسیوں مقامات پر ریاستی اور حکومتی اداروں پر حملہ کیا گیا، اب دیکھنا یہ ہے کہ پاکستان کی عدالتیں پاکستانی ڈونلڈ ٹرمپ سے متعلق کیا فیصلہ کرتی ہیں۔انہوںنے کہاکہ پاکستانی ڈونلڈ ٹرمپ جیل میں دیسی مرغی، دیسی بکرے، دیسی انڈے اور دیسی گھی سے مستفید ہو رہے ہیں۔
