لاہور( این این آئی) پاکستان مسلم لیگ (ن) کے سینئر رہنما و سابق وفاقی وزیر خواجہ سعد رفیق نے کہا ہے کہ ملک کو ٹریک پر لانے کے لئے اپنے بدلے و انتقام چھوڑنے پڑیں گے ورنہ پاکستان منزل تک نہیں پہنچ سکتا،بدقسمتی سے ملک میں تجربات کئے گئے ، آئندہ حکومت سب کے ساتھ ٹیبل پر بیٹھ کر آئندہ بیس برس کا روڈ میپ بنائے ،دبے ہوئے طبقوں کی بالادستی کے بغیر ملک ترقی نہیں کر سکتا،اگر ترقی کرنی ہے تو ہمیں انصاف کا بول بالا کرنا ہوگا،اقلیت پر حملے دنیا میں پاکستان کی جگ ہنسائی کا باعث بنتے ہیں ایسے گروہوں کی سرپرستی بند کی جائے۔ان خیالات کا اظہار انہوں نے نشاط کالونی میں مسیحی لیگی رہنمائوں کے ہمراہ کارنر میٹنگ سے خطاب کرتے ہوئے کیا ۔ اس موقع پر سینیٹر کامران مائیکل ،میاں نصیر احمد ،بشپ ڈومینک ،پاسٹر شہباز سمیت دیگر بھی موجود تھے ۔خواجہ سعد رفیق نے کہا ک جوزف نگر یا جڑانوالہ جیسے واقعات ہوتے ہیں تو انسانیت کا درد رکھنے والا تکلیف محسوس کرتا ہے،انتہا پسندانہ سوچ کا شاخسانہ ہے کچھ لوگ تصور کر چکے ہیں کہ اپنے دین کے تحفظ کے لئے دوسرے دین پر حملہ جائز ہے جو غیر مہذب و غیر شرعی ہے،کوئی مذہب بھی اقلیت پر حملہ کرنے کی اجازت نہیں دیتا، اقلیت پر حملے دنیا میں پاکستان کی جگ ہنسائی کا باعث بنتے ہیں ایسے گروہوں کی سرپرستی بند کی جائے۔ انہوں نے کہا کہ شرپسند پیٹرول بم پھینک کر کبھی آگ لگاتے ، وہ ریاستی املاک کو بھی نہیں بخشتے، ایسے ہی انتشاری گروہ انتخاب لڑ رہے ہیں ،مذہبی چورن بیچ رہے ہیں ،کوئی کیسے فیصلہ کر سکتا کہ کون جنت تو کون جہنم میں جائے گا، ظلم فلسطین ،کشمیر میں ہو یا شانتئی نگر میں ہو وہ ظالم کہلائے گا،قرآن پاک میں لکھا ہے کہ جو فساد پھیلاتے ہیں انہیں اللہ پسند نہیں کرتا۔ انہوںنے کہا کہ دبے ہوئے طبقوں کی بالادستی کے بغیر ملک ترقی نہیں کر سکتا، بنیادی حقوق برابری انصاف آئین کے پلرز ہیں لیکن بد قسمتی سے اس کی پاسداری نہیں کی گئی، ملک کی طاقتور اور غریب آدمی کے لئے الگ الگ قانون موجود ہیں
