لاہور( این این آئی)پاکستان مسلم لیگ (ن) لاہور کے صدر سیف الملوک کھوکھر نے امت مسلمہ کو ماہ رمضان کی مبارکباد پیش کرتے ہوئے کہا ہے کہ وفاقی اور پنجاب حکومت اس مقدس مہینے میں پسے ہوئے طبقات کو ریلیف دینے کے لئے ہر طرح کے وسائل بروئے کار لائے گی ، وزیر اعلیٰ پنجاب مریم نواز شریف نے گراں فروشی کے ذریعے عوام کا استحصال کرنے والوں کے گرد شکنجہ کسنے کی ہدایات جاری کر دی ہیں ۔ اپنے بیان میں سیف الملوک کھوکھر نے کہا کہ موجودہ کڑے حالات میں حکومت سنبھالنا پھولوں کی سیج نہیں ، اس وقت معیشت کو ہمالیہ جیسے چیلنجز کا سامنا ہے ، بیل آئوٹ پیکج کے لئے دوبارہ آئی ایم ایف سے رجوع کرنا ہے لیکن اس کے باوجود مسلم لیگ (ن) کے قائد نواز شریف کی رہنمائی میں شہباز شریف کی حکومت ان مشکلات سے نبرد آزما ہونے کیلئے پر عزم ہے ۔ انہوںنے کہا کہ مریم نواز شریف نے عہدے کا حلف اٹھانے کے بعد جس بر ق رفتاری سے صوبے کی ترقی اور عوام کے مسائل کے حل کیلئے اقدامات کا آغاز کیا ہے وہ اپنی مثال آپ ہے ، وہ نواز شریف اور شہباز شریف کی خدمت کی میراث کو انتہائی کامیابی سے آگے بڑھا رہی ہیں ۔ سیف الملوک کھوکھر نے کہا کہ اپوزیشن سے اپیل ہے کہ وہ ملک کو درپیش گھمبیر چیلنجز کو پیش نظر رکھے ، احتجاج ان کا آئینی و قانونی حق ہے لیکن اس کی آڑ میں ملک کی جڑوں کو کھوکھلا نہ کیا جائے ۔
