لاہور( این این آئی)صوبائی وزیر اطلاعات عظمی بخاری نے کہا ہے کہ مریم نواز پوری تحریک انصاف کے اعصاب پر سوار ہیں،مریم نواز سے کارکردگی میں مقابلہ کریں زبان درازی مت کریں۔ بیرسٹر سیف کے بیان پر اپنے رد عمل میں عظمیٰ بخاری نے کہا کہ9 مئی کے مرکزی ملزمان اور شرپسندوں کو سیاست کے لبادے میں چھپنے نہیں دیں گے،آپ آج بھی باز نہیں آئے دوسرا 9 مئی کرنے کی پلاننگ کررہے ہیں،9 مئی کے واقعات پر آ پ کو شرمندگی ہے نہ آپ نے کبھی اعتراف کیا۔جب شہدا ء کی یادگاروں کی بے حرمتی کررہے تھے تب ملک و قوم کا خیال کیوں نہیں آیا،9 مئی کا انتشاری ٹولہ اپنے غیرسیاسی گناہوں کا ملبہ مریم نواز کے کھاتے میں مت ڈالے۔انہوںنے کہاکہ مریم نواز کو بانی پی ٹی آئی اور جعلی پیرنی کی فرمائش پر موت کی چکی میں قید رکھا گیا،مریم نواز نے بانی پی ٹی آئی کی آمریت کا جرات اور بہادری سے مقابلہ کیا ،کبھی جیل میں سہولیات نہ ملنے کی شکایت نہیں کی۔آپ کو مریم نواز نے نہیں کہا تھا جائیں فوجی تنصیبات پر حملے کریں ،شہدا ء کی یاد گاریں جلائیں۔اپنے جرائم کو انسانی حقوق،عورت کارڈ اور آئین کے پیچھے مت چھپائیں۔
