مدینہ منورہ(این این آئی)مدینہ ریجن میں وزارت صحت کی شاخ نے مسجد نبوی کے قریب مرکزی علاقے میں سمارٹ روبوٹ سروس کا آغاز کیا۔غیرملکی خبررساں ادارے کے مطابق اس سروس کا مقصد دنیا بھر سے 96 سے زائد زبانوں میں عازمین حج کی حفاظت اور آگاہی کے لئے تعلیمی پیغامات، رہنمائی اور صحت کی ہدایات پیش کرنا اور نشر کرنا ہے۔دریں اثنا مدینہ منورہ کی وزارت صحت کی رضاکارانہ اور آگاہی ٹیمیں 220 مرد و خواتین رضاکاروں اور 12 سے زیادہ ٹیموں کے ساتھ اللہ کے مہمانوں کی خدمت کے لئے چوبیس گھنٹے کام کر رہی ہیں۔وہ حج سیزن کے دوران مسجد نبوی اور اس تک رسائی کی سڑکوں، شہزادہ محمد بن عبدالعزیز بین الاقوامی ہوائی اڈے اور حرمین ٹرین اسٹیشن کے ساتھ ساتھ قبا، خندق، سید الشہدا اور میقات ذوالحلیفہ کی مساجد میں صحت اور ہنگامی خدمات فراہم کرتے ہیں۔
