اسلام آباد (این این آئی)وفاقی وزیر اطلاعات ونشریات سینیٹر شبلی فراز نے کہا ہے کہ جو قومیں اپنے ہیروز کو یاد رکھتیں اور ان کے افکار کو اگے بڑھاتیں ہیں وہ ہی حقیقت میں پسے ہوئے طبقات کے مسائل کو حل کرتے ہوئے ترقی کے اہداف حاصل کرتیں ہیں ‘احمد فراز پاکستان کا اثاثہ تھے جنہوں نے اپنی شاعر ی کے ذریعے پسے ہوئے طبقات کی ترجمانی کی’ پاکستان کے عوام نے احمد فراز کو جو محبت دی اس کی نظیر نہیں ملتی۔ وہ پیر کو ایچ ایٹ قبرستان میں اپنے والدسید احمد شاہ(احمد فراز) کے یوم پیدائش پر فاتحہ خوانی کے بعد میڈیا سے گفتگو کر رہے تھے۔ان کے خاندان کے افراد بھی ان کے ہمراہ تھے۔ وفاقی وزیر اطلاعات سینیٹر شبلی فراز نے کہا کہ احمد فراز پاکستان کا اثاثہ تھے،انہوں نے ہمیشہ پسے ہوئے طبقات کی ترجمانی کرتے ہوئے ان کے مسائل کو اپنی شاعری کے ذریعے اجاگر کیا۔ انہوں نے کہا کہ احمد فراز کو پاکستان کے عوام نے جو پذیرائی اور محبت دی اس کی نظیر کم ہی ملتی ہے۔ انہوں نے کہا کہ وقت آگیا ہے ہم اپنے تمام بڑے شاعروں کے افکار کو آگے بڑھائیں اور ان کا پیغام آئندہ نسلوں تک پہنچائیں۔ قبل ازیں وفاقی وزیر نے ایچ ایٹ قبرستان میں احمد فراز کی قبر پر حاضری دی اور پھولوں کی چادر چڑھائی اور فاتحہ پڑھی
