مریم اورنگزیب نے سٹیٹ بنک رپورٹ کو عمران خان حکومت کے خلاف فرد جرم قرار دے دیا

0
372

اسلام آباد(این این آئی)پاکستان مسلم لیگ (ن) کی ترجمان مریم اورنگزیب نے سٹیٹ بنک رپورٹ کو عمران خان حکومت کے خلاف فرد جرم قرار دے دیا ۔ اپنے بیان میں انہوںنے کہاکہ عمران صاحب سٹیٹ بنک کی رپورٹ پڑھیں جو آپ کی نااہلیوں اور نالائقیوں کا ڈوزئیر ہے ،سٹیٹ بنک نے بتادیا کہ معیشت آپ نے تباہ کی، کوروناآنے سے پہلے ہی آپ معیشت کا جنازہ نکال چکے تھے ،معیشت کی تباہی پر آپ کورونا کے بعد اب پی ڈی ایم کے پیچھے چھپنے کی ناکام کوشش کررہے ہیں ،عمران صاحب جو کہانی سنا رہے ہیں، سٹیٹ بنک اس کے برعکس کوئی اور کہانی سنا رہا ہے ،سٹیٹ بنک کی رپورٹ معاشی تباہی وبربادی کے جاری سفر کی تصدیق ہے۔ انہوںنے کہا کہ جی ڈی پی گروتھ مسلم لیگ (ن) دورکے 5.5 فیصد کی بلندی سے گرکر آج تاریخی منفی 0.4 فیصد پرپہنچ چکی ہے ،انہوںنے کہاکہ عوام خبر دار ہوجائیں، آئندہ برس بھی ملک کی معاشی تباہی وبربادی کا یہ منفی سفر جاری رہے گا۔