اسلام آباد(این این آئی) پاکستان ڈیموکریٹک موومنٹ (پی ڈی ایم) نے چیئرمین اور ڈپٹی چیئرمین سینیٹ کیلئے کاغذات نامزدگی حاصل کرلیے۔ پی ڈی ایم نے چیئرمین سینیٹ کے لیے یوسف رضا گیلانی اور ڈپٹی چیئرمین کے لیے مولانا عبدالغفور حیدری کے کاغذات حاصل کیے ہیں ،دونوں عہدوں کے لیے کاغذات کے تین تین سیٹ حاصل کیے گئے ہیں۔چیئرمین اور ڈپٹی کے لیے کاغذات پی پی رہنما شیری رحمان، فاروق نائیک، جے یو آئی کے عبدالغفورحیدری اورمولانا عطاالرحمان نے حاصل کیے۔اپوزیشن ارکان نے بیلٹ پیپر کا سیمپل بھی سیکرٹری سینیٹ سے حاصل کرلیا۔سیکرٹری سینیٹ کے مطابق سبز بیلٹ پیپر چیئرمین سینیٹ اور گلابی بیلٹ پیپر ڈپٹی چیئرمین کے لیے ہے۔واضح رہے کہ چیئرمین اور ڈپٹی چیئرمین سینیٹ کیلئے الیکشن (آج) جمعہ کو ہوگا جس میں حکومت اور اپوزیشن کے درمیان کانٹے کا مقابلہ متوقع ہے، حکومت نے چیئرمین سینیٹ کے لیے صادق سنجرانی کو دوبارہ نامزد کیا ہے۔
