لاہور( این این آئی) محکمہ داخلہ پنجاب نے ضلعی انتظامیہ کو کالعدم تحریک لبیک پاکستان سے متعلق وال چاکنگ مٹانے، پوسٹرز ، فلیکسز ، بینرز اور سٹیکرز ہٹانے کے احکامات جاری کر دئیے ، کالعدم تنظیم کے تمام رہنمائوں کی زبان بندی اور کڑی مانیٹرنگ کے احکامات بھی جاری کر دئیے گئے ۔ تفصیلا ت کے مطابق وفاقی حکومت کی جانب سے تحریک لبیک پاکستان کو کالعدم قرار دئیے جانے کے بعد اس حوالے سے طے شدہ ضابطے کی کارروائیاں مزید تیز کر دی گئی ہیں۔ محکمہ داخلہ پنجاب نے ضلعی انتظامیہ کو ہدایات جاری کی ہیں کہ دیواروں پر کالعدم تحریک لبیک پاکستان کی تحریریں صاف کی جائیں ، اسی طرح پوسٹرز ، فلیکسز، بینرز اور سٹیکرز بھی ہٹائے جائیں او را س کی تفصیلی رپورٹ بھی پیش کی جائے ۔محکمہ داخلہ پنجاب نے تمام رہنمائوں کی زبان بندی کے بھی احکامات جاری کر تے ہوئے بیانات پر پابندی عائد کر دی ہے ، محکمہ داخلہ کالعدم تنظیم کی کڑی مانیٹرنگ کی بھی ہدایات جاری کر دی ہیں۔
