لاہور( این این آئی) گورنر پنجاب چودھری محمد سرور نے کہا ہے کہ کمرشل کورٹس کے قیام جیسی اصلاحات حکومت کے ان بہت سے اقدامات سے میں سے ایک ہے جو وہ کاروباری ماحول کی بہتری کے لیے اٹھارہی ہے۔ وہ لاہور چیمبر کے صدر میاں طارق مصباح کی سربراہی میں لاہور چیمبر کے وفد سے گفتگو کررہے تھے۔ صوبائی وزیر برائے انڈسٹریز، کامرس و انویسٹٹمنٹ میاں اسلم اقبال، چیئرمین پلاننگ اینڈ ڈویلپمنٹ بورڈ عبداللہ خان سنبل، ورلڈ بینک گروپ کے کنٹری ڈائریکٹر ناجی بین ہیسن ، لاہور چیمبر کے سابق صدور میاں مصباح الرحمن اور سہیل لاشاری نے بھی اس موقع پر خطاب کیا۔ گورنر پنجاب چوہدری سرور نے کہا کہ حکومت نے لاہو ہائی کورٹ کے تعان سے کمرشل کورٹس کے قیام کا جو قدم اٹھایا ہے اس سے کاروباری ماحول کو صنعت و تجارت کے موافق بنانے میں مدد ملے گی اور پنجاب میں کی جانے والے سرمایہ کاری کو تحفظ ملے گا۔ لاہور چیمبر کے صدر میاں طارق مصباح نے کہا کہ کمرشل کورٹس آرڈیننس 2021ایک اہم سنگ میل ہے جس سے کاروباری برادری کو تیز تر انصاف کی فراہمی ممکن ہوگی۔ انہوں نے کمرشل کورٹس کے قیام کو سپورٹ کرنے پر پنجاب حکومت، گورنر پنجاب، لاہور ہائیکورٹ اور ورلڈ بینک گروپ کو خراج تحسین پیش کیا۔ انہوں نے کہا کہ معاشی ترقی اور خوشحالی کے لیے کاروباری ماحول کی بہتری اشد ضروری ہے، کمرشل کورٹس آرڈیننس 2021اس مقصد کے حصول کے لیے ایک اہم قدم ہے۔ انہوں نے کہا کہ کمرشل کورٹس پاکستان میں کاروباری آسانیوں کے لیے بھی بہت اہم کردار ادا کریں گی۔
