اسلام آباد (این این آئی) پاکستان پیپلز پارٹی کے سیکرٹری جنرل نیئر حسین بخاری نے کہاہے کہ کورونا کیسز میں اضافے کے براہ راست ذمہ دار عمرا خان خود ہیں۔اپنے بیان میں نیر بخاری نے کہاکہ کل تک کورونا کو نزلہ زکام قرار دینے والا شخص آج کیسز میں اضافے کا ذمہ دار عوام کو قرار دے رہا ہے۔ انہوںنے کہاکہ حال ہی میں کورونا میں مبتلا ہونے کے باوجود عمران خان نے اجلاس کی صدارت کی تصویریں جاری کروائیں۔ انہوںنے کہاکہ خان صاحب بتائیں کہ کورونا مریض کے اس عمل سے عوام تک کیا پیغام گیا؟ کورونا کی روکتھام سے متعلق پیپلزپارٹی کی تجاویز کو نظرانداز کیا گیا۔ انہوںنے کہاکہ عوام جانتی ہے کہ کورونا کے دوران خود وزیراعظم اور وفاقی وزراء نے بڑے بڑے اجتماع کئے، کورونا کی روکتھام کے لئے اب بھی حکومت کی کوئی واضح پالیسی نہیں۔ انہوںنے کہاکہ ہسپتالوں میں سہولیات اور ویکسین کی فراہمی کی بجائے صرف عوام کو احتیاط کا کہا جا رہا ہے،عوام احتیاط ضرور کرے لیکن ریاست بھی بنیادی سہولیات کی فراہمی کو یقینی بنائے۔
