شاہ محمود قریشی کی سعودی ہم منصب سے ملاقات ،فلسطین کی صورتحال پر تبادلہ خیال

0
216

نیویارک (این این آئی)وزیر خارجہ مخدوم شاہ محمود قریشی اور سعودی عرب کے وزیر خارجہ کے درمیان اقوام متحدہ ہیڈکوارٹر نیویارک میں ملاقات ہوئی جسمیں فلسطین کی صورتحال پر تبادلہ خیال کیا گیا ۔ جاری اعلامیہ کے مطابق شاہ محمود قریشی کی شہزادہ فیصل بن فرحان آل سعود سے اقوام متحدہ کی جنرل اسمبلی کے ہنگامی اجلاس کے موقع پر ملاقات ہوئی ،جس میںفلسطین کی صورتحال پر تبادلہ خیال کیا گیا ۔ شاہ محمود قریشی نے کہاکہ پاکستان کی حکومت اور عوام اوآئی سی ایگزیکٹو کمیٹی کا ہنگامی اجلاس بلانے پر سعودی عرب کا شکریہ ادا کرتے ہیں۔ وزیر خارجہ نے کہاکہ وزیراعظم عمران خان کے دورہ سعودی عرب کے دوران جاری کردہ مشترکہ بیان مسئلہ فلسطین پر دونوں برادر ممالک کے یکساں نکتہ نظر کا اعادہ کرتا ہے۔ انہوںنے کہاکہ اسرائیلی جارحیت، فلسطینیوں کے گھروں پر زبردستی اور غیرقانونی قبضے کی شدید الفاظ میں مذمت کرتے ہیں۔ انہوںنے کہاکہ رمضان المبارک میں مسجد اقصی میں نمازیوں پر حملہ، فلسطینیوں پر بمباری انتہائی قابل مذمت ہے۔ انہوںنے کہاکہ پاکستان فلسطینیوں کے جائز حقوق بالخصوص استصواب رائے کے حق کی بھرپور حمایت کرتا ہے۔انہوںنے کہاکہمشرقی یروشلم دارالحکومت، 1967 سے قبل کی سرحدوں اورمتحد وجود کی حامل قابل عمل اورخودمختار فلسطینی ریاست کے قیام کی حمایت کا اعادہ کرتے ہیں۔ انہوںنے کہاکہ اقوام متحدہ اور اوآئی سی کی متعلقہ قراردادوں پر عمل درآمد کرایا جائے۔دونوں وزرائے خارجہ نے دونوں برادرممالک کے دوطرفہ تعلقات کے مختلف پہلووں پر تبادلہ خیال کیا۔