لاہور( این این آئی)معرکہ کارگل کے ہیرو حوالدار لالک جان کا 22 واں یوم شہادت گزشتہ روز منایا گیا۔شہیدلالک جان کو1999ء میں کارگل کی جنگ کے دوران پرجوش لگن اورجرات کامظاہرہ کرنے پرملک کااعلی ترین اعزازنشان حیدرعطا ء کیاگیاتھا۔جب کارگل کی جنگ چھڑی توحوالدار لالک جان ناردرن لائٹ انفنٹری رجمنٹ میں خدمات انجام دے رہے تھے اوروہ بھارت کے بھاری حملے ناکام بنانے کے لئے اگلے محاذ پر برسرپیکاررہے۔انہوں نے مئی 1999ء میں اگلی پوزیشنوں پرتعیناتی کے لئے رضاکارانہ طورپر اپنی خدمات پیش کیں۔ 7 جولائی کو علاقے میں دشمن کی طرف سے شدیدگولہ باری کے نتیجے میں لالک جان شدید زخمی ہوئے،وہ زخموں کے باوجوداپنی پوزیشن پرڈٹے رہے اوربھارتی حملہ پسپاکیالیکن وہ زخموں کی تاب نہ لاسکے اورشہادت کے عظیم رتبے پرفائزہوئے۔
