واشنگٹن (این این آئی)امریکی سینٹرل کمانڈ کے کمانڈر فرینک میک کینزی نے اعلان کیا ہے کہ انہوں نے قطر میں تحریک طالبان تحریک کے سینیر رہ نماں سے ملاقات کی ہے۔میڈیارپورٹس کے مطابق میک کینزی نے طالبان کو یقین دلایا کہ افغانستان میں شہریوں اور اتحادیوں کی حفاظت اولین ترجیح ہے۔ امریکی عہدیدارکا کہنا تھا کہ انہوں نے کابل ائیرپورٹ کا دورہ کیا ہے اور وہاں پرحالات اب قابومیں ہیں۔امریکی قومی سلامتی کے مشیر جیک سولیوان نے کہا کہ ان کے ملک کی افغانستان میں اب کوئی خاص توقعات نہیں ہیں۔ انہوں نے ایک سوال کے جواب میں وضاحت کرتے ہوئے کہا کہ واشنگٹن طالبان کی اپنی ذمہ داریوں کو پورا کرنے کا انتظار کر رہا ہے خاص طور پر لوگوں کو محفوظ راستہ فراہم کرنے سے متعلق ذمہ داریوں کو پورا کرنے کا منتظر ہے۔انہوں نے مزید کہا کہ یہ اچھی طرح واضح ہے کہ طالبان اور داعش ایک دوسرے سے لڑ رہے ہیں۔ ایک دوسرے پر حملے کرتے ہیں۔ اس لیے میں وہاں تعلقات کی توقع نہیں کرتا۔ ہمیں دیکھنا پڑے گا کہ آگے کیا ہوتا ہے۔انہوں نے کہا کہ ہم دن رات محنت کر رہے ہیں تاکہ زیادہ سے زیادہ لوگوں کو باہر نکالا جا سکے۔ لہذا میں ٹائم لائن کے سوال پر قیاس آرائی نہیں کروں گا۔ ہم طالبان سے آگے بڑھنے کی کیا توقع کریں گے۔یہ وہ چیز ہے جس کی ہمیں وقت کے ساتھ نگرانی کرنی ہے۔ دیکھنا یہ ہے کہ آیا طالبان بنیادی انسانی حقوق اور لوگوں کے انسانی وقار ، لوگوں کے لیے ائیرپورٹ تک محفوظ راستہ فراہم کرنے اور منصفانہ سلوک کے لیے اپنی ذمہ داریاں پوری کرنے پر تیار ہیں یا نہیں
