ابوظہبی (این این آئی)متحدہ عرب امارات کی کابینہ نے اسرائیل کے ساتھ طے پانے والے امن معاہدے اور سفارتی تعلقات کے قیام کی توثیق کردی۔غیرملکی خبررساں ادارے کے مطابق امارات کے وزیر اعظم اور دبئی کے حکمران شیخ محمد بن راشد آل مکتوم کی زیر صدارت اجلاس میں امن معاہدے کو خطے کے ممالک اور اقوام کے درمیان امن اور ہم آہنگی کو فروغ دینے کا اہم ذریعہ قرار دیا گیا ہے۔ اس دوران شیخ محمد بن راشد نے کہا کہ امن معاہدہ خطے کو اقتصادی، ثقافتی اور ادراک کو مستحکم کرنے میں مدد گار ثابت ہوگا۔اسرائیلی کابینہ نے گزشتہ ہفتے امارات کے ساتھ طے پانے والے معاہدے اور سفارتی تعلقات کی توثیق کی تھی۔ امارات، بحرین اور اسرائیل نے 15 ستمبر کو امن معاہدہ اور سفارتی تعلقات کا اعلان کیا تھا، وائٹ ہاوس میں منعقد ہونے والی تقریب کی میزبانی امریکی صدر ڈونلڈ ٹرمپ نے کی تھی۔
