صنعاء (این این آئی)یمن کے علاقے مرب میں ایرانی حمایت یافتہ حوثی ملیشیا کے ٹھکانوں پر یمنی فوج اور اس کی معاون عرب اتحادی فوج نے گولہ باری کی جس کے نتیجے میں حوثی ملیشیا کو بھاری جانی نقصان اٹھانا پڑا ہے۔ حوثی ملیشیا کو زیادہ نقصان المشجح اور الکسارہ کے علاقوں میں اٹھانا پڑا ہے۔میڈیارپورٹس کے مطابق یمن کی مسلح افواج کے میڈیا سینٹر نے بتایا کہ فوج اور مزاحمت کاروں نے حوثی ملیشیا کے سات ارکان ہلاک کیے۔ یہ ہلاکتیں اس وقت ہوئیں جب حوثی جنگجو المشجح محاذ میں ایک فوجی مرکز میں گھسنے کی کوشش کر رہے تھے۔بیان میں مزید کہا گیا کہ اتحادی جنگی طیاروں نے حوثی ملیشیا کے المشجح اور الکسارہ میں موجود مراکز کو نشانہ بنایا۔ بمباری میں26جنگجو ہلاک اور زخمی ہوئے۔ کارروائی میں ایک گاڑی کو تباہ کر دیا گیا اور اس میں موجود تین جنگجو بھی ہلاک ہو گئے۔
