لاہور( این این آئی)مسلم لیگ(ن) پنجاب کی ترجمان عظمی بخاری نے کہا ہے کہ چوہان صاحب ہمیں معلوم تھا آپ کو اب مروڑ اٹھیں گے ،آپ لوگ تین سال سے گاجریں کھارہے ہیں پیٹ میں درد توہونا ہے ،پی ڈی ایم کے جلسے میں نوازشریف اور شہباز شریف کی تقریروں سے اسلام آباد میں ہلچل مچی ہوئی ہے ۔ اپنے بیان میں انہوںنے کہاکہ شہبازشریف نے جیسے ہی لانگ مارچ کا اعلان کیا ،عمران خان اور اس کے حواریوں کو پسو پڑ گئے ،پی ڈی ایم کا لانگ مارچ ملکی تاریخ کا سب سے بڑا اسلام آباد کی جانب مارچ ہوگا،عمران خان لاکھوں کے لانگ مارچ کیلئے حسب وعدہ کنٹینر اور بریانی تیار رکھیں۔ انہوںنے کہا کہ عمران خان کی الف لیلیٰ کی کہانیاں سن سن کر قوم تنگ آچکی ہے ،اب ہم عمران خان کو بتائیں گے دھرنا اور لانگ مارچ کیا ہوتا ہے ،اب کی بار مولانا فضل الرحمن او ر نوازشریف کی قیادت میں لانگ مارچ بھی ہوگا اور کٹھ پتلی کو بھی بھگائیں گے ،ہم بار بار کہتے ہیں عمران خان آخر میں اکیلے ہوں گے اور سب پیراشوٹرز فرار ہوجائیں گے۔
