صنعاء (این این آئی )یمن میں مارب شہر کے اطراف ایک بار پھر سرکاری فوج اور عوامی مزاحمت کاروں کی حوثی ملیشیا کے ساتھ لڑائی شروع ہو گئی۔عسکری ذرائع نے فرانسیسی خبر رساں ایجنسی کو بتایا کہ گذشتہ 48 گھنٹوں کے دوران میں فضائی حملوں کے نتیجے میں 60 سے زیادہ حوثی ہلاک ہو گئے جب کہ یمنی فوج کے 18 اہل کار اپنی جانوں سے ہاتھ دھو بیٹھے۔ذرائع کا کہنا تھا کہ حوثیوں نے پے در پے حملے کیے۔ تاہم یمنی فوج نے ان حملوں کو پسپا کر دیا۔اس سے قبل حوثی ملیشیا نے گذشتہ دو روز کے دوران اپنے زیر کنٹرول چار صوبوں سے نفری کی صورت میں عسکری کمک مارب کے محاذوں پر پہنچائی تھی۔یاد رہے کہ یمنی فوج نے گذشتہ ہفتے اعلان کیا تھا کہ مارب شہر کی سمت جاری پیش قدمی کی کوشش میں حوثی ملیشیا کو کافی نقصان اٹھانا پڑا۔
