کراچی(این این آئی)وزیر مملکت برائے موسمیاتی تبدیلی زرتاج گل نے کہا ہے کہ مجھے تو لگتا ہے پی ٹی آئی مزید پانچ سال حکومت کرے گی، ہمارے پاس اب بھی دو سال باقی ہیں کام کرتے رہیں گے،ہمیں فخر ہے کہ ہم نے کوویڈ میں بھی بہتر کام کیا، ہم نے ماحول دوست ماحولیاتی نظام پر بہت کام کیا ،ہم نے ملک میں ایسی کوئی چیز نہیں آنے دی جس سے اوزون کو نقصان پہنچے، ہم نے 8 نئے قومی پارک بنائے، اب 23 قومی پارک ہیں، ہم نے پاکستان میں پلاسٹک مکمل بند کرنے کے لیے کافی حد تک کام کیا ہے، ہم کوشش کررہے ہیں آنے والی نسل کو بہترین ماحول ملے،کوشش کریں گے اوزون سطح کو محفوظ بناسکیں، پاکستان مونٹریال پروٹوکول کا ذمہ دار فریق ہونے کے باعث اہم معیارات حاصل کر چکا ہے۔ ان خیالات کا اظہار انہوں نے گزشتہ روز یہاں مقامی ہوٹل میں منعقدہ تقریب “منٹریال – کیپنگ یوز ، ہمارا فوڈ اینڈ ویکسینز کول” سے بطور مہمان خصوصی خطاب کرتے ہوئے کیا۔انہوں نے بتایاکہ پاکستان نے مونٹریال پروٹوکول کے تحت دیے گئے 35 فیصد کے مقابلے میں 50 فیصد ہائرو فلورو کاربن (HFCs) مرحلے کا ہدف حاصل کر لیا انہوں نے مزید کہا کہ ایچ سی ایف سی کے مرحلے کی تعمیل 2021 تک برقرار رکھی جارہی ہے۔ اس کے علاوہ ، امپورٹ پالیسی آرڈر (آئی پی او)اور فیڈرل بورڈ آف ریونیو(ایف بی آر)کے تعاون سے ایچ سی ایف سی کی درآمد کو کنٹرول کرنے کے لیے فول پروف لائسنسنگ سسٹم قائم کیا گیا ہے۔ زرتاج گل نے بتایا کہ حکومت نے اوزون ختم کرنے والے مادے (او ڈی ایس)کی پہلی نسل جیسے مادوں کی درآمد پر بھی پابندی لگا دی ہے۔ ایک ارب درخت لگانے کا ہدف بھی حاصل ہوچکا ہے اور دنیا نے اسے تسلیم بھی کیا ہے۔ میٹرو پولیس شہر میں بارش کے بعد ، شہر میں نکاسی آب کا نظام عام طور پر درہم برہم ہو چکا ہے ، انہوں نے مزید کہا کہ پلاسٹک کی آلودگی سے چھٹکارا پانے کے لیے پلاسٹک کے تھیلوں پر پابندی عائد کی جائے گی
