کامیاب پاکستان پروگرام کے مشاورتی بورڈ کا اجلاس

0
40

اسلام آباد (این این آئی)وزیر خزانہ شوکت ترین کی زیر صدارت کامیاب پاکستان پروگرام کے مشاورتی بورڈ کا اجلاس ہوا جس میں تمام فریقین کی مشاورت سے پروگرام کے مختلف پہلوئوں کو حتمی شکل دی گئی۔ جمعہ کو ہونے والے اجلاس میں پروگرام کے تحت بنکوں اور مائیکرو فنانس اداروں سے متعلق بھی تبادلہ خیال کیا گیا،اجلاس میں فنڈز کے اجراء اور سہ ماہی جائزے کا بھی فیصلہ کیا گیا۔ اعلامیہ کے مطابق کامیاب پاکستان انفارمیشن سسٹم تشکیل دیکر ٹول فری نمبر فراہم کیا جائے گا، یہ نظام تصدیق اور توثیق کیلئے نادرا اور احساس ڈیٹا کے ساتھ منسلک کیا جائے گا۔ وزیر خزانہ شوکت ترین نے کہاکہ حکومت کے کامیاب پاکستان پروگرام سے کمزور طبقے کا معیار زندگی بلند ہوسکے گا، اس پروگرام میں بنک کم آمدنی والے طبقے کے ساتھ مائیکروفنانس اداروں کے ذریعے منسلک ہوں گے۔ شوکت ترین نے کہاکہ کامیاب پاکستان پروگرام مختلف مراحل میں شروع کیا جائے گا، پہلے مرحلے میں پسماندہ اور غریب اضلاع کے مستحقین شامل ہوں گے۔