اسلام آباد (این این آئی)پاکستان تحریکِ انصاف کے سینیٹر فیصل جاوید خان نے کہا ہے کہ آئندہ الیکشن الیکٹرانک ووٹنگ مشین پر ہوں گے۔سماجی رابطے کی ویب سائٹ ٹوئٹر پر جاری کئے گئے ایک بیان میں پاکستان تحریکِ انصاف کے سینیٹر فیصل جاوید خان نے کہاکہ دھاندلی کے بغیر انتخابات نہ جیتنے والے الیکٹرانک ووٹنگ مشین کی مخالفت کر رہے ہیں، صاف شفاف انتخابات کے لیے تحریکِ انصاف کی کوششیں ہمیشہ جاری رہیں۔سینیٹر فیصل جاوید نے کہا کہ ہم نے الیکشن سسٹم ٹھیک کرنے کے لیے ملکی تاریخ کا سب سے طویل احتجاج کیا۔پی ٹی آئی رہنما نے کہا کہ عمران خان نے اپنی پارٹی کے 20 اراکینِ پارلیمنٹ کو ووٹ بیچنے پر نکالا۔انہوں نے کہا کہ کرکٹ کی دنیا میں شفافیت اور میرٹ یقینی بنانے کے لیے عمران خان نیوٹرل امپائر لائے۔سینیٹر فیصل جاوید نے کہاکہ آئندہ الیکشن میں انشاء اللّٰہ بیرونِ ملک مقیم پاکستانیوں کو ووٹ کا حق حاصل ہو گا۔
