اسلام آباد (این این آئی)صدر مملکت ڈاکٹر عارف علوی نے کہا ہے کہ ملک کو تیز تر سماجی و اقتصادی ترقی کے راستے پر ڈالنے کیلئے اعلیٰ تعلیم کو فروغ دینے کی ضرورت ہے ۔ جمعہ کو یہاں صدر مملکت ڈاکٹر عارف علوی کو فاؤنڈیشن یونیورسٹی اسلام آباد کے صدر وقار احمد ملک نے بریفنگ دی ۔ اس موقع پر صدر مملکت نے کہاکہ ملک کو تیز تر سماجی و اقتصادی ترقی کے راستے پر ڈالنے کیلئے اعلیٰ تعلیم کو فروغ دینے کی ضرورت ہے ، ہائبرڈ تعلیم کے حجم میں اضافہ ملک میں اعلیٰ تعلیم یافتہ اور ہنر مند پیشہ ور افراد کی تعداد بڑھانے میں مددگار ثابت ہوگا، یونیورسٹی انتظامیہ ایچ ای سی کی اعلیٰ تعلیمی اداروں میں منشیات کے استعمال اور خصوصی طلباء کی فلاح و بہبود کی پالیسیوں کو نافذ کرے ۔ انہوں نے کہاکہ نئی پالیسی میں خصوصی طلباء کیلئے ٹیوشن فیس ، ہاسٹل فیس اور یوٹیلیٹی فیس معاف کر دی گئی ، یونیورسٹی ہائبرڈ اور ورچوئل ایجوکیشن کو فروغ دینے اور معیاری گریجویٹس پیدا کرنے کیلئے حکمت عملی اور وڑن پر نظر ثانی کرے ۔ انہوںنے کہاکہ دنیا تیزی سے بدل رہی ہے ، پاکستان کو مصنوعی ذہانت اور کلاؤڈ کمپیوٹنگ جیسی ابھرتی ٹیکنالوجیز اپنانے کی ضرورت ہے۔صدر ایف یو آئی نے اجلاس کو اعلیٰ تعلیم کے فروغ میں یونیورسٹی کے کردار کے بارے میں آگاہ کیا ۔ بتایاگیاکہ یونیورسٹی تعلیم ، تحقیق اور جدت میں مہارت کے ذریعے انسانی وسائل کی ترقی میں اپنا حصہ ڈال رہی ہے، 2015ـ2020 کے دوران 8960 طلباء یونیورسٹی سے مختلف ڈگری پروگراموں میں فارغ التحصیل ہوئے ، فاؤنڈیشن یونیورسٹی پی ایچ ڈی گریجویٹس کی تعداد بڑھانے پر توجہ دے رہی ہے ،یونیورسٹی انڈومنٹ فنڈ کے ذریعے مستحق طلباء کو میرٹ وظائف ، ضرورت پر مبنی مالی مدد اور فیس میں چھوٹ فراہم کر رہی ہے۔
