اسلام آباد (این این آئی)سپریم کورٹ میں دھدوچہ ڈیم کی تعمیر کیلئے اضافی زمین کی خریداری سے متعلق کیس میں پنجاب حکومت نے زمین کی خریداری سے متعلق رپورٹ جمع کرا دی۔جمعہ کو جسٹس سجاد علی شاہ کی سربراہی میں دو رکنی بنچ نے سماعت کی۔ جمع کرائی گئی رپورٹ میں کہاگیاکہ مختلف مشکلات کی وجہ سے ڈیم کی تعمیر کا آغاز تاحال نہیں ہوسکا،زمین مالکان کی مقدمہ بازی اور ڈیم کی تعمیر کی نوعیت مشکلات میں شامل ہیں۔رپورٹ میں کہاگیاکہ ڈیم کے قریب کسی بھی قسم کی تعمیرات پر پابندی لگا دی گئی ہے،گردونواح کی زمینوں کے مالکان کو کو تعمیرات سے روکنے کے نوٹس جاری کر دئیے گئے،ڈیم کیلئے اضافی زمین حاصل کرنے کیلئے 1773 ملین روپے فراہم کر دیئے ہیں۔رپورٹ کے مطابق عدالت نے رپورٹ کی کاپی فریقین کو فراہم کرنے کا حکم دیدیا۔ بعد ازاںکیس کی سماعت دو ہفتوں کیلئے ملتوی کر دی گئی
