اسلام آباد (این این آئی)پارٹی کے خلاف بیانات پر پیپلزپارٹی نے وزیر مملکت فرخ حبیب کو چیلنج دیدیا ۔ اپنے بیان میں سلیم مانڈی والا نے کہاکہ فرخ حبیب کے پیپلزپارٹی کے فنانشل دستاویز تک رسائی سے متعلق بیانات جھوٹ اور حقائق کے منافی ہیں، جعلی اکاونٹس کیس الیکشن کمیشن میں زیر سماعت ہے۔ سلیم مانڈی والا نے کہاکہ فیصلے سے قبل فرخ حبیب نے پیپلزپارٹی پر 12 اکائونٹس چھپانے کا الزام عائد کرکے پارٹی کو بدنام کرنے کی کوشش کی ہے، الیکشن کمیشن کے فیصلے سے قبل ہی فرخ حبیب کے بیانات کیس پر اثرانداز ہونے کے مترادف ہیں۔ انہوںنے کہاکہ الیکشن کمیشن کے فیصلے سے قبل فرخ حبیب نے کیس کا فیصلہ کیسے سنا دیا؟ الیکشن کمیشن فرخ حبیب کے ان بیانات کا فوری نوٹس لے۔ انہوںنے کہاکہ پیپلزپارٹی نے اکاونٹس سے متعلق تمام دستاویز جمع کرا رکھے ہیں، فرخ حبیب کو چیلنج کرتے ہیں کہ پیپلزپارٹی پر لگائے گئے الزامات ثابت کریں۔ سلیم مانڈ ی والا نے کہاکہ سب کو معلوم ہے کہ پیپلزپارٹی نہیں بلکہ خود تحریک انصاف جعلی اکاونٹس کیس سے بھاگ رہی ہے، وفاقی وزراء کے الیکشن کمیشن پر حملوں کی ایک وجہ یہ بھی ہے کہ انہیں پتہ ہے کہ انکی چوری پکڑی جا رہی ہے۔
