اسلام آباد (این این آئی)وزیراعظم کے معاون خصوصی برائے صحت ڈاکٹر فیصل سلطان نے پولی کلینک میں میڈیکل اور سرجیکل آئی سی یو کی آپ گریڈیشن کا افتتاح کر دیا ۔ جمعہ کو ڈاکٹر فیصل سلطان نے میڈیکل اور سرجیکل آئی سی یو کی آپ گریڈیشن کا افتتاح کیا ، یو این سی آر کی جانب سے پولی کلینک کو دی جانے والی مشینری اور آلات کا جائزہ لیا ۔ ڈاکٹر فیصل سلطان نے یو این سی آر کی جانب سے مشینری اور آلات مہیا کرنے پر ان کاشکریہ ادا کیا ۔ ڈاکٹر فیصل سلطان نے کہاکہ پولی کلینک کی میڈیکل اور سرجیکل آئی سی یو کی گریڈیشن سے مریضوں کو مزید سہولیات میسر آئیں گی ۔ انہوںنے کہاکہ حکومت عوام کو بہترین جدید سہولیات کی فراہمی کو یقینی بنارہی ہے ،وزیراعظم کے نزدیک صحت کا شعبہ ہماری اولیں ترجیح ہے۔ انہوںنے کہاکہ سرکاری ہسپتالوں کی کارکردگی کو مزید بہتر بنانے کیلئے مربوط حکمت عملی جاری ہے۔ انہوںنے کہاکہ ہماری حکومت یونیورسل ہیلتھ کوریج کو یقینی بنانے کیلئے پر عزم ہے ۔ انہوںنے کہاکہ عوام کو جدید معیاری طبی سہولیات کی فراہمی کیلئے تمام تر وسائل بروئے کار لارھے ہیں ۔انہوںنے کہاکہ عوام کو صحت کی سہولیات کی فراہمی کیلئے صحت انصاف کارڈ کا بھی دایرہ کار وسیع کر دیا ہے ۔ ڈاکٹر فیصل سلطان نے کہاکہ ڈینگی کے مریضوں کو بہترین طبی سہولیات فراہم کی جارہی ہیں ،ہسپتال کیلئے پانچ ایکڑ کا قطعہ مختص کیا گیا ہے ۔ انہوںنے کہاکہ ہسپتال کی تعمیر اور سہولیات بین الاقوامی معیار کی ہوں گی ،جی الیون میں جلد ہسپتال کی تعمیر شروع ہو جاے گی فنڈز مختص کیے جا چکے ہیں۔
