اسلام آباد(این این آئی) وزیر اعظم عمران خان نے کہا ہے کہRUDA اور CBD دونوں حکومت کے اہم منصوبے ہیں جو ملک میں جدید، خود انحصار، صاف اور سبز رہائشی اور کاروباری سہولتوں کو فروغ دیں گے،اپنی بہترین لوکیشن کی وجہ سے یہ رنگ روڈ اور موٹر وے کے ذریعے با آسانی قابل رسائی ہے،مختلف مینوفیکچرنگ اور صنعتی یونٹس ہوں گے۔وزیراعظم عمران خان نے راوی اربن ڈیولپمنٹ اتھارٹی (RUDA) اور سینٹرل بزنس ڈسٹرکٹ (CBD) والٹن کے بارے میں جائزہ اجلاس کی صدارت کی۔ وزیر اعظم نے کہاکہ RUDA اور CBD دونوں حکومت کے اہم منصوبے ہیں جو ملک میں جدید، خود انحصار، صاف اور سبز رہائشی اور کاروباری سہولتوں کو فروغ دیں گے۔ وزیر اعظم نے کہاکہ یہ منصوبے ملک میں ہاؤسنگ اور تعمیراتی شعبوں میں براہ راست غیر ملکی سرمایہ کاری (FDI) کو فروغ دینے کے لیے بہت اہم ہیں۔ وزیراعظم نے حکام کو ہدایت کی کہ دونوں منصوبوں کے لیے زیادہ سے زیادہ سرمایہ کاری کو یقینی بنایا جائے۔وزیر اعظم کو بتایا گیا کہ سینٹرل بزنس ڈسٹرکٹ (سی بی ڈی) میں سڑکوں، سیوریج اور نکاسی آب سمیت بنیادی ڈھانچے کی ترقی پر کام زوروں پر ہے اور امکان ہے کہ یہ مقررہ وقت سے پہلے ہی مکمل ہو جائے گا،اس کے علاوہ باب پاکستان پراجیکٹ پر تعمیراتی کام بھی جلد شروع ہو جائے گا۔وزیراعظم کو بتایا گیا کہ RUDA اپنے Saphire Bay پروجیکٹ کو تعمیر کرنے کے لیے پوری طرح تیار ہے۔ مزید یہ کہ قابل تجدید توانائی سے چلنے والی جدید ترین انڈسٹریل اسٹیٹ بھی بہت جلد شروع کر دی جائیگی۔ انہوںنے کہاکہ اپنی بہترین لوکیشن کی وجہ سے یہ رنگ روڈ اور موٹر وے کے ذریعے با آسانی قابل رسائی ہے، اور اس میں مختلف مینوفیکچرنگ اور صنعتی یونٹس ہوں گے۔
