نئی دہلی(این این آئی)بھارتی پولیس نے معروف امریکی آن لائن ریٹیل کمپنی ایمازون کے مقامی سربراہان پر افیم کی آن لائن اسمگلنگ اور فروخت کے الزامات عائد کردیئے ۔بھارتی ٹی وی کے مطابق دو افراد کو گزشتہ ہفتے ریاست مدھیا پردیش میں 21 کلو گرام (46 پائونڈ)منشیات کے ساتھ گرفتار کیا گیا تھا اور انہوں نے افسران کو بتایا کہ وہ ایمازون کے انڈین پلیٹ فارم کا استعمال کر کے اپنا سامان ملک میں کہیں اور بھیج رہے ہیں۔ان لوگوں نے اپنی فصل کو قدرتی مٹھاس کے حامل اسٹیویا کے پتے بتا کر اس کی جعلی مارکیٹنگ کرکے بھیجنے کا اعتراف کیا ہے۔رپورٹ میں کہا گیا کہ تفتیش میں پولیس کی جانب سے جمع کیے گئے شواہد اور کمپنی کی جانب سے دیے گئے جوابات میں تضاد کی وجہ سے ایمازون کے بھارت میں سربراہان پر الزامات عائد کیے گئے ہیں۔ابھی تک پولیس اور ایمازون نے اس بارے میں کوئی عندیا نہیں دیا کہ کتنے ملازمین کو ان الزامات کا سامنا ہے۔ایمازون نے کہا کہ وہ اس معاملے کی تحقیقات کر رہا ہے اور اتوار کو اے ایف پی کو دیے گئے بیان میں پولیس کو مکمل تعاون کی یقین دہانی کرائی۔کمپنی کے ترجمان نے کہا کہ ہم ان مصنوعات کی فہرست سازی اور فروخت کی اجازت نہیں دیتے جو قانون کے تحت ممنوع ہیں۔
