اسلام آباد (این این آئی)اسپیکر قومی اسمبلی اسد قیصر سے امریکی کانگرس کے اراکین کے وفد نے کانگرس کی امور خارجہ کمیٹی کے چیئرمینMr. Gregory Meeks کی سربراہی میں ملاقات کی جس میں دوطرفہ تعلقات ، خطے کی صورتحال اور باہمی دلچسپی کے امور پر تبادلہ خیال کیا گیا ۔ اسد قیصر نے کہاکہ دونوں ممالک میں پارلیمانی سطح پر رابطوں میں اضافہ دوطرفہ تعلقات کو مزید مستحکم بنانے میں اہم کر دار ادا کر سکتا ہے۔ اسپیکر اسد قیصر نے کہاکہ دونوں ممالک میں جمہوریت کی بالادستی، قانون کی حکمرانی اور انصاف کی فراہمی قد مشترک ہیں۔ اسد قیصر نے کہاکہ امریکہ میں مقیم 1 ملین سے زاہد پاکستانی تارکین وطن دونوں ممالک کے مابین پل کر کردار ادا کر رہے ہیں۔ انہوںنے کہاکہ امریکہ پاکستان میں انفراسٹریکچر کی ترقی ، سرمایہ کاری دیگر اہم شعبوں میں شراکت دار ہے، خطے میں پائیدار امن کے قیام کے لیے دونوں ممالک میں رابطوں کا فروغ ضروری ہے۔اسد قیصر نے کہاکہ موجودہ پارلیمان میں خواتین ، بچوں ، خصوصی افراد اور معاشرے کے پسماندہ طبقات کے حقوق کے تحفظ کے لیے قانون سازی عمل میں لائی گئی ہے۔ انہوں نے کہاکہ پاکستان میں اظہار رائے کی مکمل آزادی ہے اور حال ہی میں پارلیمان نے صحافیوں کے تحفظ کا بل منظور کیاہے۔ انہوںنے کہاکہ افغانستان میں امریکی انخلا کے بعد معاشی بحران جنم لے رہاہے اس بحران پر بروقت قابو پانا ضروری ہے ۔چیئر مین کانگرس کمیٹی برائے خارجہ امور نے کہاکہ امریکہ پاکستان کے ساتھ اپنے تعلقات کو بڑی اہمیت دیتا ہے اور دوطرفہ تعاون میں فروغ کے ذریعے انہیں مزید مستحکم بنانے کا خواہاں ہے۔ امریکی وفد نے کہاکہ دونوں ممالک کی پارلیمانوں کے اراکین پارلیمنٹ کے وفود کے تبادلوں سے ہم آہنگی کو فروغ حاصل ہو گا
