اسلام آباد (این این آئی)اسلام آباد ہائی کورٹ نے ڈاکٹر عمران فاروق قتل کیس میں دلائل سننے کے بعد اپیلوں پر فیصلہ محفوظ کرلیا ۔ہفتہ کو ملزمان خالد شمیم، معظم علی اور محسن علی کی سزا کے خلاف اپیلوں پر فریقین کے دلائل مکمل ہونے پر اسلام آباد ہائی کورٹ نے نے دلائل سننے کے بعد اپیلوں پر فیصلہ محفوظ کرلیا،چیف جسٹس اطہر من اللہ اور جسٹس عامر فاروق نے فیصلہ محفوظ کرلیا۔وفاق کی جانب سے ڈپٹی اٹارنی جنرل خواجہ امتیاز کے دلائل اور تحریری جواب گراف کے ساتھ پیش ہوئے ،ڈپٹی اٹارنی جنرل نے ملزمان کی اپیلیں خارج کرنے کی استدعا کردی ۔ڈپٹی اٹارنی جنرل نے کہاکہ ملزمان کے خلاف ٹھوس شواہد اور دستاویزات موجود ہیں،عدالت انسداد دہشت گردی عدالت کا فیصلہ برقرار رکھے۔ملزمان خالد شمیم، معظم علی اور محسن علی کے وکلاء کے دلائل اور تحریری جواب بھی جمع کئے گئے ،اسلام آباد ہائی کورٹ نے تینوں ملزمان کی سزا کے خلاف اپیلوں پر فیصلہ محفوظ کرلیا،انسداد دہشت گردی عدالت نے ملزمان کو قید و جرمانے کی سزا سنائی تھی،ملزمان پر لندن میں ڈاکٹر عمران فاروق کے قتل کا الزام ہے۔
