واشنگٹن(این این آئی)سابق امریکی صدر ڈونلڈ ٹرمپ کے بڑے بیٹے جونیئر ٹرمپ نے منگنی کرلی۔بین الاقوامی میڈیا رپورٹس کے مطابق یہ خبریں سامنے آرہی ہیں کہ ڈونلڈ ٹرمپ کے بڑے بیٹے جونیئر ٹرمپ نے اپنی گرل فرینڈ کمبرلی گلفائل سے منگنی کرلی جبکہ یہ جوڑی جلد شادی کرنے کا ارادہ بھی کررہے ہیں۔سابق امریکی صدر ڈونلڈ ٹرمپ کے قریبی ذرائع کے مطابق ابھی تک ان کے بیٹے کی شادی کی کوئی تاریخ طے نہیں کی گئی۔دوسری جانب کمبرلی گلفائل نے اپنے انسٹاگرام اکائونٹ پر جونیئر ٹرمپ کے ہمراہ اپنی کچھ تصاویر شیئر کیں جن میں ان کے ہاتھ میں منگنی کی انگوٹھی دیکھی جاسکتی ہے۔انہوں نے اپنی پوسٹ کے کیپشن میں لکھا کہ آج کی رات جونیئر ٹرمپ کی سالگرہ منانے کے لیے خاص تھی۔جونیئر ٹرمپ کی گرل فرینڈ نے ان سے مخاطب ہوتے ہوئے لکھا کہ تم مضبوط، ہوشیار، بہادر، مضحکہ خیز اور میری زندگی کے پیارے انسان ہو۔انہوں نے مزید لکھا کہ میں اپنی باقی زندگی ایک ساتھ گزارنے کا انتظار نہیں کر سکتی ہوں اور میں تم سے پیار کرتی ہوں۔واضح رہے کہ ڈونلڈ ٹرمپ کے سب سے بڑے بیٹے اور کمبرلی گلفائل سال 2018 سے ڈیٹنگ کر رہے ہیں۔
