لاہور (این این آئی) سینئر اداکار عدنان صدیقی نے کہا ہے کہ معاشرے میں سدھار پیدا کرنے کیلئے ہر فرد کو اپنی اپنی جگہ پر ایمانداری سے کام کرنا چاہیے ،دنیا کی ترقی یافتہ قوموں میں بنیادی نقطہ صرف یہی ہے کہ وہاں کا ہر شہری اپنی ذمہ داریوں اور حقوق سے بخوبی آگاہ ہے ۔گفتگو کرتے ہوئے کہا کہ اگر کسی ادارے کا سربراہ اچھا ہو تو ماتحت غلط کام کرتے ہوئے ڈرتا ہے اور یہ ترتیب ہر اد ارے اور حکومتوں تک جاتی ہے ۔ انہوں نے کہا کہ دنیا کے ترقی یافتہ ممالک میں لوگ بروقت ٹیکس ادا کرتے ہیں جس سے حکومتی مالی معاملات سے تمام مسائل حل ہوتے ہیں ۔حکومت صرف ان لوگوں سے ٹیکس وصو ل کرے جن کی آمدن اسی طرح کی ہو جس پر ٹیکس عائد ہوسکے ۔ ہمارے ہاں ٹیکس کلچر کو زبردستی مسلط کیا جاتا ہے کبھی جاگیر داروں اور وڈیروں سے زرعی ٹیکس وصول نہیں کیا جاتا اور غریب لوگوں کے بجلی بلوں میں بھی پانچ ، چھ قسم کے ٹیکس ڈال دئیے جاتے ہیں جس کی کسی کو سمجھ نہیں آتی۔ انہوں نے کہا کہ ملک کی ترقی کیلئے ضروری ہے کہ ہم سب اپنی اپنی ذمہ داریوں کو احسن طریقے سے اداکریں اور حکومت کو بھی چاہیے کہ وہ اپنے شہریوں کو بنیادی حقوق فراہم کرے جو ریاست کی ذمہ داری ہوتی ہے ۔
