لاہور( این این آئی)پاکستان مسلم لیگ (ن)کے صدر شہبازشریف نے یوم یکجہتی کشمیر پر کشمیری شہداء کو سلام اورعظیم جدوجہد پر کشمیریوں کو خراج تحسین پیش کرتے ہوئے کہا ہے کہ تنازعہ جموں وکشمیر کے منصفانہ حل کے بغیر جنوبی ایشیامیں پائیدار امن و ترقی کا خواب پورا نہیں ہوسکتا ،5 اگست 2019 کے غیرقانونی اور یکطرفہ بھارتی اقدامات عالمی قانون، اقوام متحدہ کی سلامتی کونسل کی قراردادوں کی خلاف ورزی ہیں ۔ اپنے بیان میں انہوں نے کہا کہ عالمی برادری بھارت کو انسانی حقوق کی سنگین اور منظم پامالیوں، عالمی قانون کی خلاف ورزیوںپر جوابدہی کے کٹہرے میں کھڑا کرے ،سلامتی کونسل کی قراردادوں اور کشمیریوں کی خواہشات کے مطابق تنازعہ جموں وکشمیر حل کرایا جائے، پانچ فروری کا دن اقوام متحدہ، سلامتی کونسل اور عالمی برادری سے تقاضہ کرتا ہے کہ وہ اپنی قانونی، جمہوری اور انسانی ذمہ داریاں پوری کریں ،یوم یکجہتی کشمیر پاکستانی عوام کے جموں وکشمیر کے اپنے بھائیوں بہنوں کی حمایت جاری رکھنے کے عزم کا دن ہے۔ انہوں نے کہا کہ جموں وکشمیر کے عوام نے استصواب رائے کے حق کے حصول اور بھارتی قبضے سے نجات کے لئے تاریخی جدوجہد کی ہے ،نسل درنسل کشمیریوں کی شہادتیں ان کے آزادی سے کم کچھ نہ قبول کرنے کے آہنی عزم کا مظہر ہیں ،ہم کشمیری شہداء کو سلام عقیدت پیش کرتے ہیں، عوام کی حقیقی قیادت کو ان کی ثابت قدمی پر خراج تحسین پیش کرتے ہیں ۔ انہوں نے کہا کہ فلسطین اور جموں وکشمیر کے تنازعات اقوام متحدہ، سلامتی کونسل اور عالمی برادری کے لئے دوبڑے چیلنج ہیں ،دیرینہ ترین تنازعات کے حل تک اقوام متحدہ کے قیام کے بنیادی مقاصد پورے نہیں ہوں گے ،اقوام متحدہ کو اپنی ساکھ کی بحالی کے لئے جموں وکشمیر اور فلسطین کے تنازعات کا منصفانہ حل یقینی بنانا ہوگا۔
