پیرس (این این آئی)فرانس کے وزیرخارجہ نے کہاہے کہ عالمی طاقتوں کے ایران کے ساتھ 2015میں طے شدہ جوہری معاہدے کو بچانے کا فیصلہ چند دن کی دوری پر ہے لیکن اب یہ ایران پر منحصر ہے کہ وہ سیاسی انتخاب کرے۔میڈیارپورٹس کے مطابق فرانسیسی وزیرخارجہ ژاں وائی ویس لودریان نے پارلیمنٹ کو بتایا کہ یہ ہفتوں کی بات نہیں بلکہ یہ چند دنوں کا معاملہ ہے۔ان کے بہ قول مغربی طاقتوں، روس اور چین میں معاہدے کے خاکے پر ہم آہنگی پائی جاتی ہے۔انھوں نے کہا کہ ایرانیوں کو سیاسی فیصلے کرنے کی ضرورت ہے۔یا تو وہ آنے والے دنوں میں ایک سنگین بحران کو جنم دے سکتے ہیں یا وہ اس معاہدے کو قبول کریں جو تمام فریقوں کے مفادات کا احترام کرتا ہے۔لودریان کا کہنا تھا کہ ہم سچائی کے لمحے کے قریب آ رہے ہیں۔ ہم چاہتے ہیں کہ ایران اپنے (جوہری) عدم پھیلا کے وعدوں کااحترام کرے اورامریکا کی جانب سے پابندیاں ختم کرنے کے بدلے میں کچھ اقدامات کرے۔
