طرابلس (این این آئی)لیبیا کے مقتول سربراہ معمر قذافی کے بیٹے سیف الاسلام قذافی کی ایک نئی تصویر سوشل میڈیا پر گردش میں آئی ہے۔ میڈیارپورٹس کے مطابق تصویر میں وہ اپنے پائوں پر دو زانوں بیٹھے ہوئے نظر آ رہے ہیں۔ ذرائع نے اس تصویر کے درست ہونے کی تصدیق کی۔ ذرائع کے مطابق یہ تصویر ایک ہفتے سے زیادہ پرانی ہے۔سیف الاسلام لیبیا میں آئندہ صدارتی انتخابات میں نامزد امیدوار ہیں۔ جنوری کے اواخر میں انہوں نے اپنے ایک بیان میں ملک کو درپیش صورت حال کے حل کے لیے ایک سیاسی منصوبہ پیش کیا تھا۔سیف الاسلام گذشتہ برس نومبر میں سبھا شہر میں صدارتی انتخابات کے لیے کاغذاتِ نامزدگی جمع کرانے کے بعد سے روپوش ہو گئے۔ اس اقدام نے انتخابی کمیشن کو مجبور کر دیا کہ وہ سیف الاسلام کا نام نامزد امیدواروں کی فہرست سے نکال دے۔ بعد ازاں سبھا کی عدالت نے حکم جاری کیا تھا کہ سیف الاسلام کا نام لیبیا میں صدارتی انتخابات کے امیدواروں کی حتمی فہرست میں شامل کیا جائے۔
