لاہور(این این آئی) وفاقی وزیر ریلوے اعظم سواتی نے کہا ہے کہ وزیراعظم عمران خان نے اپوزیشن کے چوروں کی کمائی کا ذریعہ بند کیا ہوا ہے، تحریک عدم اعتماد لے کر آئیں تو دودھ کا دودھ اور پانی کا پانی ہوجائے گا،ریلوے میں منافع زیادہ ہوگا تو کرایہ بھی کم ہوگا، 70سال سے پاکستان ریلوے کا اسکریپ چوری ہو رہا ہے جس کو روکنے کیلئے چھاپے مارے جارہے ہیں۔لاہور میں میڈیا سے گفتگو کرتے ہوئے انہوں نے کہا کہ اپوزیشن جس طرح بولتی رہی ہر بل پر ان کو شکست دی، پاکستان کے لوگ جانتے ہیں کہ آپ کے کیا کرتوت تھے۔اعظم سواتی نے اپوزیشن جماعتوں سے کہا کہ آپ تحریک عدم اعتماد لائیں دودھ کا دودھ پانی کا پانی ہوجائے گا ، ہم نے ہر بل کی منظوی پر آپ کو شکست دی ہے، آپ کے لانگ مارچ کے لیے بھی تیار ہیں۔ انشااللہ اپوزیشن کو بری طرح شکست ہوگی۔پیپلز پارٹی کے لانگ مارچ کے حوالے سے انہوں نے کہا کہ ہم نے آپ کے لانگ مارچ دیکھ لیے، عوام سے لوٹا ہوا مال لانگ مارچ پر خرچ ہورہا ہے، کرپشن سے مال بنانا بند ہوگا تو ان کی سیاست بھی ختم ہوگی، ہم آپ کے مقابلے کیلئے تیار ہیں، آپ کا منہ کالا ہوگا اور رسوائی ہوگی۔اعظم سواتی کا کہنا تھا کہ پاکستان نے جس شخص کو3بار وزیراعظم بنایا وہ آج ملک سے بھاگ کر باہر بیٹھا ہوا ہے،وہ لندن سے تار کھینچ رہا ہے مگر پاکستان نہیں پہنچ رہی۔پیپلز پارٹی پر تنقید کرتے ہوئے ان کا کہنا تھا کہ بلاول زرداری تو ذوالفقار علی بھٹو نہیں ہے، جعلی عدم اعتماد والوں کو منہ کی کھانی پڑے گی۔یہ لوگ پہلے بھی مار کھاتے رہے پھر مار پڑے گی سینیٹ میں اپوزیشن لیڈر غائب ہوجاتا ہے جنہوں نے چوری کی وہ ہمارے خلاف کیا کھڑے ہونگے بلکہ آئندہ آنے والی حکومت بھی ہماری ہی ہوگی۔وزیر ریلوے نے کہا کہ پاکستان ریلوے میں ترقی کی رفتار اور تیز کریں گے
