لاہور (این این آئی) وزیراعلیٰ پنجاب سردارعثمان بزدار نے کہا ہے کہ یوم پاکستان پر لانگ مارچ کا اعلان قومی یکجہتی کو نقصان پہنچانے کے مترادف ہے، پی ڈی ایم کو قومی مفادات کا رتی بھر بھی احساس نہیں۔وزیراعلی پنجاب عثمان بزدارسے صوبائی وزرا میاں اسلم اقبال، ہاشم جواں بخت اور حامد یار ہراج نے ملاقات کی۔ اس موقع پر عثمان بزدار کا کہنا تھا کہ یہ لوگ اپنی سیاسی دکانداری چمکانے کیلئے قومی مفادات کو دا پر لگا رہے ہیں، پی ڈی ایم نے سیاسی ناپختگی اور غیر ذمہ داری کا ثبوت دیا، موجودہ حالات میں منفی سیاست کی ذرا سی بھی گنجائش نہیں۔عثمان بزدار کا کہنا تھا کہ اپوزیشن کی سیاست کسی اصول یا نظریے کی بنیاد پر نہیں، اپوزیشن کے ہر ہتھکنڈے کا ڈٹ کر مقابلہ کریں گے، قوم وزیراعظم عمران خان کے سا تھ ہے اور ساتھ رہے گی، تحریک انصاف متحد ہے اور حکومت مدت پوری کرے گی۔
