اسلام آباد (این این آئی)اپوزیشن اتحاد پاکستان ڈیموکریٹک موومنٹ کے ترجمان حافظ حمد اللّٰہ نے کہا ہے کہ تاریخی عدالتی فیصلے نے پاکستان کی عدالتی تاریخ کا نقشہ بدل دیا۔اپنے بیان میں انہوںنے کہاکہ فیصلے نے واضح کر دیا کہ آئین و قانون سب سے بالاتر اور مقدس ہیں، عدالت کا تاریخی فیصلہ آئین، قانون، پارلیمنٹ، جمہوریت اور انصاف کی فتح ہے۔حافظ حمد اللّٰہ نے کہا کہ فیصلہ نظریہ ضرورت کی ہار اور نظریہ جمہوریت کی جیت ہے، سپریم کورٹ کا فیصلہ غیر آئینی رولنگ دینے والے کے منہ پر طمانچہ ہے۔انہوں نے کہا کہ غداری کے سرٹیفکیٹ دینے والے عمران نیازی عدالت سے آئین شکن ثابت ہو چکے، آئین شکن کو ٹی وی پر قوم سے خطاب کرنے کا کوئی حق حاصل نہیں۔ترجمان پی ڈی ایم نے کہاکہ سپریم کورٹ کے تاریخی فیصلے نے حق و سچ کا بول بالا کیا ہے، قوم سے جھوٹ بولنے اور اسے دھوکا دینے والوں کا محاسبہ ہونا ضروری ہے۔
