کراچی (این این آئی)سینئر اداکارہ ثمینہ پیرزادہ نے موجودہ سیاسی صورتحال کے باعث حکومتی جماعت اور اپوزیشن کے کارکنان کی جانب سے سیاسی رہنماؤں اور صحافیوں کے گھر کے باہر احتجاج کی مذمت کی ہے۔ٹوئٹر پر جاری بیان میں ثمینہ پیرزادہ نے کہا کہ کسی بھی سیاسی لیڈر، کارکن یا صحافی کے خاندان کے گھر کے سامنے مظاہرہ اچھی بات نہیں۔اداکارہ نے لکھا کہ گھر والوں کو ہراساں کرنا غیر اخلاقی ہے، ہم باشعور اور ذمہ دار لوگ ہیں۔واضح رہے کہ لندن میں مقیم پاکستان کے سابق وزیر اعظم نواز شریف کے گھر کے باہر پاکستان تحریک انصاف کے حامیوں کا شدید احتجاج جاری ہے جب کہ مسلم لیگ ن کے کارکن عمران خان کی سابقہ اہلیہ جمائما گولڈ اسمتھ کے گھر کے باہر سراپا احتجاج ہیں۔
