سیالکوٹ (این این آئی) ملک بھر کی طرح سیالکوٹ میں بھی پولیس نے کریک ڈائون کرتے ہوئے پاکستان تحریک انصاف کے صوبائی ٹکٹ ہولڈر مرزا دلاور بیگ کے بھائی سہیل بیگ سمیت متعدد کارکنوں کو گرفتار کرکے مقدمات درج کرلئے ۔ تفصیلات کے مطابق پاکستان تحریک انصاف کے چیئرمین عمران خان کی جانب سے اسلام آباد کی طرف لانگ مارچ کے اعلان پر پاکستان تحریک انصاف کے کارکنوں کی جانب سے اسلام آباد کی طرف نکلنے کی کوشش کے دوران سیالکوٹ پولیس نے تحریک انصاف کے صوبائی امیدوار دلاور بیگ کے بھائی سہیل بیگ سمیت متعدد رہنمائوں کوگرفتار کرلیا۔ مقدمے کے مطابق پولیس کو مخبر کے ذریعے اطلاع دی گئی کہ مرزا دلاور بیگ کے بھا ئی مرزاسہیل بیگ سکنہ رحیم پور کھچیاں ، ارشد عباس ولد عنایت حسین قوم سید ساکن کھروٹہ معہ پچاس سے ساٹھ افراد کے ہمراہ مسلح ڈنڈوں اور سوٹوں کے ساتھ قانون کی خلاف ورزی کرتے ہوئے شاہراہ عام پر راستہ روک کر نعرہ بازی کررہے ہیں جس پر پولیس نے فوری کارروائی کرتے ہوئے مرزا دلاور بیگ کے بھائی سہیل بیگ سمیت متعدد کارکنوں کو گرفتارکر کے راستے کلیئر کروائے ۔ پولیس کے مطابق حکومت پنجاب کی جانب سے ضلع بھر میں دفعہ 144 نافذ ہے جس کی خلاف ورزی پر ان لوگوں کو گرفتار کیا گیا ۔ پولیس کے مطابق مذکورہ افراد نے دفعہ 149/147/431/188 ت پ ایم پی او /3 کا ارتکاب کیا ہے ۔
