اسلام آباد (این این آئی)وفاقی وزیر ماحولیاتی تبدیلی شیری رحمن نے بھارتی حکمراں جماعت بی جے پی رہنمائوں کے توہین آمیز بیانات کی سخت مذمت کرتے ہوئے کہا ہے کہ بی جے پی رہنمائوں نے مسلمانوں کی دل آزاری کی ہے۔مائیکرو بلاگنگ سائٹ ٹوئٹر پر جاری اپنے بیان میں شیری حمن نے کہا کہ پیارے نبی ۖ کے بارے میں بی جے پی رہنمائوں کے اشتعال انگیز بیانات کی شدید مذمت کرتے ہیں۔انہوں نے کہا کہ نا صرف بھارت بلکہ دنیا بھر کے مسلمانوں کے جذبات مجروح ہوئے ہیں، عالمی دنیا اور انسانی حقوق کی تنظیمیں اس کا نوٹس لیں۔انہوںنے کہاکہ مودی حکومت حساس مذہبی معاملات پر لوگوں میں نفرت پھیلا رہی ہے، عالمی دنیا کا رواداری کا معیار باقی ممالک کے لیے الگ اور مودی کے لیے الگ نہیں ہو سکتا۔شیری رحمن نے کہا کہ بھارتی انتہا پسندی دنیا کے لئے ایک خطرہ بن چکی ہے، بی جے پی رہنمائوں کی صرف پارٹی رکنیت معطل کرنا کافی نہیں، مودی سرکار کو دنیا کے تمام مسلمانوں سے باضابطہ معافی مانگنی چاہیے۔
