اسلام آباد (این این آئی)اسپیکر قومی اسمبلی اور چیئرمین سینٹ نے پیٹرول پر اٹھنے والے اخراجات پر 40 فیصد کٹوتی کا فیصلہ کرلیا ۔ جمعہ کو اسپیکر قومی اسمبلی راجہ پرویز اشرف اور چیئر مین سینٹ محمد صادق سنجرانی نے ملاقات کی جس میں بجٹ اور پارلیمان کے دونوں ایوانوں کے جاری اجلاسوں اور قانون سازی کے حوالے سے گفتگو کی گئی ۔ اسپیکر قومی اسمبلی نے کہاکہ ملک معاشی مشکلات سے دوچار ہے، سیاسی قیادت کو مل کر اس بحران سے نکالنے کے لیے لائحہ عمل مرتب کرنا وقت کی اہم ضرورت ہے۔ انہوںنے کہاکہ عوام کے نمائندے ہیں، ان کے تکلیف کو محسوس کرتے ہیں اور ان کے ساتھ کھڑے ہیں، مشکل حالات میں کفایت شعاری کو اپنانا ناگزیر ہے۔قومی اسمبلی اور سینٹ سیکرٹریٹ میں پٹرول پر اٹھنے والے اخراجات میں 40 فیصد کٹوتی کا اعلان کیا گیا ،پیٹرول کی مد میں 40 فیصد کٹوتی کا اطلاق اسپیکر و ڈپٹی اسپیکر، چیئرمین و ڈپٹی چیئرمین سینٹ، و دیگر اعلی عہدیداران پر ہو گا۔ اس کٹوتی کا اطلاق دونوں ایوانوں کے قائمہ کمیٹیوں کے چیئرمینوں اور تمام افسران پر لاگو ہو گا۔
