اسلام آباد (این این آئی)چیئر مین سینٹ صادق سنجرانی نے سینیٹر عرفان صدیقی کو صحافی نوشین یوسف والے معاملہ کو حل کر نے کی ہدایت کی ہے ۔ جمعہ کو چیئرمین سینیٹ صادق سنجرانی کی زیرصدارت سینیٹ اجلاس ہوا ۔ سینیٹر دنیش کمارنے کہاکہ نوشین یوسف ایک بہادر اور پروفیشنل صحافی ہیں،میں ان کے ساتھ ہونے والے واقعہ کی بھر پور مذمت کرتا ہوں۔ سینیٹر عرفان صدیقی نے کہاکہ ہماری باقاعدہ سینیٹ کوور کرنے والی نوشین یوسف کا پرس کھینچنے کی کوشش کی گئی،اس واقعہ میں ان کو خراشیں بھی آئیں،ابھی تک کچھ پتا نہیں وہ کون لوگ تھے،یہ بہت سنگین مسئلہ ہے،صحافیوں کے جان ومال کا تحفظ ہماری ذمے داری ہے۔ انہوںنے کہاکہ صحافی اختر عباسی کے بھائی کا قتل ہوا،صحافی نفیس نعیم کو اٹھایا گیا پھر چھوڑ دیا گیا،جناب چیئرمین آپ نے میری اس حوالے سے ڈیوٹی لگائی تھی۔چیئرمین سینیٹ نے سینیٹر عرفان صدیقی کو نوشین یوسف والے معاملے کو حل کرنے کی ہدایت کی اور کہاکہ آئی جی اسلام آباد سے ملاقات کریں اور معاملہ حل کریں۔وزیر مملکت ملک شہادت اعوان نے کہاکہ اس معاملے کو میں خود دیکھوں گا اور ابتک کی پیشرفت کا جائزہ لوں گا۔سینیٹر اعظم سواتی نے کہا کہ صحافیوں کو ہر طرح کی پروٹیکشن دینا ہمارا قانونی اور آئینی ذمہ داری ہے۔
