اسلام آباد (این این آئی)وزیر اعظم شہباز شریف نے کورونا وائرس کے بڑھتے ہوئے کیسز کے باعث این سی او سی کو مکمل بحال کرنے کا فیصلہ کر لیا۔وزیرِ اعظم شہباز شریف کی زیرِ صدارت کورونا وائرس کی وباء کو قابو کرنے کے لیے بنائے گئے نیشنل کمانڈ اینڈ آپریشن سینٹر (این سی اوسی) کا اہم اجلاس منعقد ہوا۔اجلاس میں وزارتِ صحت اور این سی او سی کے حکام نے شرکت کی۔اجلاس میں کورونا وائرس کے بڑھتے ہوئے کیسز پر وزیرِ اعظم شہباز شریف نے اظہارِ تشویش کرتے ہوئے این سی او سی کو مکمل بحال کرنے کا فیصلہ کیا۔وزیرِ اعظم شہباز شریف نے اجلاس میں حکام کو کورونا وائرس سے بچائو کی احتیاطی تدابیر پر عمل کرانے کی ہدایت کی۔انہوں نے تمام صوبوں اور ضلعی انتظامیہ کو کورونا وائرس کی ایس او پیز پر عمل درآمد کی ہدایات بھی جاری کیں۔وزیرِ اعظم شہباز شریف نے ہدایت کی کہ کورونا وائرس سے بچائو کیلئے تمام ضروری اقدامات کیے جائیں۔
