اسلام آباد (این این آئی)مشیر امور کشمیر و گلگت بلتستان قمر زمان کائرہ نے کہا ہے کہ مسئلہ کشمیر کو عالمی سطح پر اجاگر کرنے کا اپنا اخلاقی، قانونی اور سیاسی فریضہ سر انجام دیتے رہیں گے۔ جمعہ کو سینٹ کی قائمہ کمیٹی برائے کشمیر و گلگت بلتستان میں اظہار خیال کرتے ہوئے انہوںنے کہاکہ مسئلہ کشمیر کو عالمی سطح پر اجاگر کرنے کا اپنا اخلاقی، قانونی اور سیاسی فریضہ سر انجام دیتے رہیں گے۔ انہوںنے کہاکہ یاسین ملک کی بھارتی جارحیت کے خلاف طویل جدوجہد ہے،پاکستان مسئلہ کشمیر کو دنیا کے تمام فورمز پر بھرپور انداز سے اجاگر کر رہا ہے ۔ انہوںنے کہاکہ وزارت امور کشمیر نے مسئلہ کشمیر پر آزاد کشمیر کی تمام سیاسی جماعتوں کی آل پارٹیز کانفرنس کا انعقاد کیا ۔ انہوںنے کہاکہ مسئلہ کشمیر پر سینئر وکلاء ، ججز اور یونیورسٹیز کو بھی مشاورت کا حصہ بنا رہے ہیں ، پاکستان کی یونیورسٹیز میں کشمیر چیئر قائم کرنے کے اقدامات کر رہے ہیں۔ انہوںنے کہاکہ مسلم ممالک کو مسئلہ کشمیر پر مزید ٹھوس موقف اپنانے کی ضرورت ہے،مضبوط پاکستان اور موثر سفارت کاری ہی مسئلہ کشمیر کا حل ہیں۔ انہوںنے کہاکہ کشمیر سٹیٹ پراپرٹی میں بے ضابطگیوں کا نوٹس لیا ہے، مکمل چھان بین کر رہے ہیں،گلگت بلتستان میں قدرتی آفات کے حوالے سے سو سے زائد انتہائی خطرناک مقامات ہیں،گلگت بلتستان میں موسمیاتی تبدیلی کے سروے کے لیے ریڈار سسٹم گلگت بلتستان پہنچ چکا ہے ،مالی مشکلات کے باوجود آزاد کشمیر اور گلگت بلتستان کو پچھلے سال کے برابر بجٹ دیا ہے،غیر ریاستی افراد آزاد کشمیر میں پراپرٹی نہیں خرید سکتے
